ಚಿತ್ರಕಲೆಯ ಮೂಲಕ ಕಲಾತ್ಮಕ ಅಭಿವ್ಯಕ್ತಿ ಸಾಧ್ಯ- ಅಂಬಾದಾಸ ಜೋಶಿ ಅಭಿಮತ

ಸಪ್ತಸಾಗರ ವಾರ್ತೆ, ವಿಜಯಪುರ, ನ. 25:
ಚಿತ್ರಕಲೆ ಮೂಲಕ ಕಲಾತ್ಮಕ ಅಭಿವ್ಯಕ್ತಿ ಸಾಧ್ಯ ಎಂದು ಸಮಾಜ ಸೇವಕ ಅಂಬಾದಾಸ ಜೋಶಿ ಅಭಿಪ್ರಾಯ ಪಟ್ಟರು.
ವಿಜಯಪುರದ ರೇಡಿಯಂಟ್ ಪಿಯು ಕಾಲೇಜು ಮತ್ತು ನೀಟ್ ಅಕಾಡೆಮಿಯಲ್ಲಿ ಉದ್ದೇಶಪೂರಿತ ಹಾಗೂ ಸೃಜನಾತ್ಮಕ ಚಿತ್ರಕಲಾ ಸ್ಪರ್ಧೆಯ ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಗಳಾಗಿ ಅವರು ಮಾತನಾಡಿದರು.
ಈ ಕಾರ್ಯಕ್ರಮದ ಉದ್ದೇಶ ವಿದ್ಯಾರ್ಥಿಗಳಲ್ಲಿ ಕಲಾತ್ಮಕ ಅಭಿವ್ಯಕ್ತಿಯ ಜೊತೆಗೆ ಸೌಂದರ್ಯಬೋಧ ಮತ್ತು ಸೃಜನಶೀಲತೆಯ ವಿಕಾಸವನ್ನು ಉತ್ತೇಜಿಸುವುದಾಗಿತ್ತು ಎಂದೂ ಅವರು ತಿಳಿಸಿದರು.
ಈ ಸಂದರ್ಭದಲ್ಲಿ ಅಂಬಾದಾಸ ಜೋಶಿ ಅವರನ್ನು ಆಹ್ವಾನಿಸಲಾಯಿತು. ಅವರು ಜಿಲ್ಲಾ ಪ್ರವಾಸೋದ್ಯಮ ಅಭಿವೃದ್ಧಿ ಸಮಿತಿಯ ಸ್ಥಾಪಕ ಸದಸ್ಯರಲ್ಲಿ ಒಬ್ಬರಾಗಿದ್ದು, ವಿಜಯಪುರ ವಿಮಾನ ನಿಲ್ದಾಣದಲ್ಲಿ ಮೊದಲ ವಿಮಾನದ ಆರಂಭದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.
ಕಾರ್ಯಕ್ರಮವು ಪವಿತ್ರ ಕುರಾನ್ ಪಾಠದೊಂದಿಗೆ ಆರಂಭವಾಯಿತು. ಬಳಿಕ ಪ್ರಾಚಾರ್ಯರು ಹಾಗೂ ಜೀವಶಾಸ್ತ್ರ ಉಪನ್ಯಾಸಕರಾದ ಕೆ. ಎಂ. ಗುನ್ನಾಪೂರ ಅವರು ಸ್ವಾಗತಿಸಿದರು.
ಇನ್ನೋರ್ವ ಅತಿಥಿ ಎ.ಜಿ. ಜೋಶಿ ಅವರು ಕಾರ್ಯಕ್ರಮವನ್ನು ಉದ್ಘಾಟಿಸಿ, ಶಿಕ್ಷಣದ ಜೊತೆಗೆ ಸೃಜನಶೀಲತೆಯೂ ವಿದ್ಯಾರ್ಥಿಯ ಅತ್ಯಾವಶ್ಯಕ ಗುಣವಾಗಿದೆ ಎಂದು ಹೇಳಿದರು.
ಅವರು ವಿದ್ಯಾರ್ಥಿಗಳ ಕಲಾಕೃತಿಗಳನ್ನು ಮೆಚ್ಚಿ, ಚಿತ್ರಕಲೆಯ ಮೂಲತತ್ತ್ವಗಳನ್ನು ವಿವರಿಸಿದರು. ಮತ್ತು ಯಶಸ್ವಿ ವಿದ್ಯಾರ್ಥಿಗಳಿಗೆ ಪ್ರಮಾಣಪತ್ರಗಳು ಹಾಗೂ ಬಹುಮಾನಗಳನ್ನು ವಿತರಿಸಿದರು.
ಈ ಸಂದರ್ಭದಲ್ಲಿ ಕಾಲೇಜಿನ ಟ್ರಸ್ಟಿಗಳಾದ ಎಸ್. ಎಸ್. ಜಹಾಗೀರ್‌ದಾರ, ಮೊಹಮ್ಮದ್ ಅಫ್ಜಲ್, ಪ್ರಾಚಾರ್ಯರು ಹಾಗೂ ಉಪಪ್ರಾಚಾರ್ಯ ಡಾ. ಎಂ.ಎಂ. ಕಾದ್ರಿ ಉಪಸ್ಥಿತರಿದ್ದರು. ಕನ್ನಡ ಉಪನ್ಯಾಸಕಿ ಕುಮಾರಿ ಜ್ಯೋತಿ ಚೌಧರಿ ನಿರೂಪಿಸಿದರು.
ಹಿಂದಿ ಉಪನ್ಯಾಸಕಿ ಬಿಬಿ ಫಾತಿಮಾ ಪಟೇಲ್ ವಂದಿಸಿದರು.